منتدى يعني باخبار المريخ ويبحث كل مايدور في اروقة المريخ الكيان بكل شفافيةنبراسنا حبنا للمريخ الكيان دون مسميات لاننحاز ولا ننقاد نعمل كعين ساهرة تحرس المريخ
 
الرئيسيةالبوابةاليوميةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 اعجبنـــــــــــــــــــي

اذهب الى الأسفل 
كاتب الموضوعرسالة
عباس ميرغني
عضو جديد
عضو جديد
avatar

عدد المساهمات : 28
السٌّمعَة : 100
تاريخ التسجيل : 21/05/2014

مُساهمةموضوع: اعجبنـــــــــــــــــــي    الثلاثاء مايو 27, 2014 2:08 pm

هو الضامن روحو بكرة نصيح والا مكسر منو ؟
والضامن إنو بعد شهر عندو حق الفطور منو ؟
موش القدر دا .. في زول بيمنعو ؟

شنو أي زول تسألو يقوليك
والله العيشة مابتغلب زول لكن العرس في نفسو مكلف .. !!

شنو يعني مكلف دي ؟
العرس دا في نهااااية الموضوع كدة شنو ؟
موش إتنين قاعدين في بيت الله ورقبتهم ؟

طيب شنو التخلف والتكلف دا ..
ماتجو من الآخر والسلام ..

إذا إنت عارف نفسك ظروفك كيف ، وعارف إنو إنت عندك البيعيشك شهر والشهر الجاي عند الكريم ..
شنو لزوم إجراءات ومصاريف وتكاليف غبية ماعندها أي قيمة !؟

تلقى الزول مرتبو مليون ويعمل عرس بي تلتين مليون ، دا لو ماسوا أي شي ..
عارف المبلغ دا مرتبك لي مدة كم ؟
سنتين ونص !

يعني سنتين ونص إنت روحك تمرق عشان تعمل إجراءات عرس إسبوع ماتاماها ..!!

يقوليك والله ما مني بس المرة عاوزة حاجات ..
الحاجات التطير ليكم في راسكم إنت والمرة ..

هى زولة متخلفة وإنت متخلف أكتر منها ..
الناس تقول شنو ؟

يا أخت بالله شغلي المخاتة الفي راصك دي ،،
الناس لو قالت او ماقلت إنتي الخسرانة او إنتي الكسبانة ، شنو يعني الناس ؟
شنو يعني إذا الناس قالت ماجابو ليها حاجات ؟
شنو يعني لو قالو عرسك كان مبشتن ؟

نحنا باعزيزتي الفاضلة في الفين واربعطاشر ..
يعني لو قفلتي عليك بابك وخشيتي الفيسبوك صوت الناس مابتسمعيهو ..

لكن هل الناس ديل برحموك لو ماعرستي ؟
نفففس الناس الإنتي راعيتي ليهم وإتطلبتي هم اول الشامتين فيك في أي حال ماكويس يحصل ليك
بعد تكملي فيهم عشرة مليون عشان يضربهم التكييف ساعتين في صالة ..

هل هم بيعيشو معاك العمر ؟
هل بيدوك اولاد ؟
هل بيزاحموك في سريرك الفاضي ستة سنة ؟
هل .. وهل وهل ؟

قلنا ليكم يابشر افهمو ..
...ري كلام الناس تعيش لستك جواني وتموت كركاسة ..

شيلة وشبكة وريحة وزفت ..!!
فوق كم ؟؟
وليه ذاتو ؟؟
تشتري مليار قطعة عشان تعرضيهم للناس ؟
انا جابو لي ؟

اها دا السبب البخليك ح تعرضي ملايينك المطبقة والمرصوصة في شكل سفينة ،
وتعرضي الأرياح الجابوها ليك والدهب والتياب و جبل الملابس الداخلية ..
ح تعرضيهم ايوة .. بس في مخيلتك .. في خيالك كلما الوحدة نهشتك ..

في زول عرس زولة بي إسكيرتيها وبلوزتها وفتيل خمرة قالو انتحر ؟
في زول عرسو كلف مليون قالو العروس شردت ؟

الناس تشغل مخها يا أهلنا ..

الوحدة تلقاها خاشة فيسبوك وواتساب وتويتر وبتحضر افلام وتتكلم إنجليزي ،
وبعد دا تلقى فهمها أطين من الطين ..

مابتشوفو الخواجات ديل ؟
يوم واحد شفتو خواجة شايل ليهو شيلة وفطور عريس وضابح عجل ؟

مالهم طيب ؟ متخلفين ؟ مفلسين ؟
عاداتنا ؟ تقاليدنا ؟ مجتمعنا ؟

ختوهم كلهم في فتيل جلسرين واقفلو الفتيل كويس ،، وارموهو في حمام بلدي .. ماسايفون ..

وكمان جابت ليها شقة وتجهيزات شقة ..
الله يشق راصك ياخ ..
إنتي عارفة الجلوس بي كم ؟
طيب عارفة التلاجة الكبيرة بي كم ؟
طيب العدة الفي راسك الكبير دا عارفاها بي كم ؟

طيب لما عارفاها ماسألتي روحك يجيبوها ليك من وين ؟
يبقى حرامي مثلا" ؟ والا يضيع زمنو كلو معاك في الواتساب ..
وخلي بالك من نفسك .. لا إله إلا الله ..
ويرجاها تقول ليهو محمد رسول الله ..

إنتو هسي لو بتعرفو الله والرسول صاح .. كان عرفتو إنو اقلهن مهرا" أكثرهن بركة ..
تناسب طردي يابتاعة الجامعة إنتي ..
عندك دبلوم والا بكلاريوس وبعد دا راجية يشترو ليك حاجات الحبس زي العجل ؟

ووالله ووالله .. وقسما" بالله
انا لا أجد أي فرق بين الزولة البترفض ليها زول لمجرد إنو مفلس وبين العجل ..
سوى إنو دا الله خلقو زول ودا خلقو عجل ..

لكن تكريم الإنسان بالعقل ..
والله النوع دا لا يملك من العقل مثقال صفار بيضة ..

الأدهى والأمر ..
والبيتشكل الغباء في بني آدم ..
الزول البيخلي زولة هو دايرها عشان عندها قروش او وضعهم كويس ..
بي حجة إنو ماح يقدر يعيشها في الوضع الكانت عايشة فيهو ..

ياحبيبنا دي زولة والا نعجة هولندية ؟
شنو هو المابقدر اعيشها ..
هى موش عارفة وشايفة وضعك ومقتنعة ؟
طيب إنت مابتثق في رؤيتها للمستقبل ؟
طيب دي ح تضمنها على بيتك وسندك في شدايدك كيف ؟؟

ياخ العرس دا ماشي سيئ للدرجة دي ..
عشان تقولي اها انا لو جبت اولاد في وضعي الهسي دا أعيشهم كيف واعالجهم كيف واقريهم كيف ؟؟

ماتجيب اولاد ..
بس ..

اها اسألني قولي ما أجيب اولاد كيف عشان اديك بالتلفون دا في عينك ..

عرس وماتجيب اولاد ..
لو سألوك مابقيتو تلاتة قوليهم انا وحبيبتي العسولة دي متفقين إننا مانجيب اولاد ..
أي زول فاهم ومحترم روحو ح يقطم منك ..

الناس العبطا البيتعابطو ليه وفي شنو والواحد يقعد يغمز ليك عيونو ويلولو ليك خشمو ديل احسمهم طوالي ..
والله ياخ الله ماكاتب لينا الولد ..
في مشكلة حمل .. عيان انا .. المرة دي ماعندها رحم ..
اها ح يقولو ليك شنو يعني ؟

إنت البتدير حياتك .. وإنت البتتحكم فيها .. وإنت البترسم مستقبلك عاوزو كيف ..

عمرو السعادة ماكانت وضع مادي ،
وعمرو راحة البال ماكان بالقروش ..
وعمرو الناس مارضت عن الزول قبل الزول مايرضى عن نفسو ..

دحين يا أخوانا إستهدو بالله .. وختو الكورة واطة ..

وأي زول وزولة قادرين يوفرو البيعيشهم كفاف يومهم ..
يخلو كل القديم هنا ا ا ا ا ك ..

ويجيبو ورقة وقلم ويكتبو الضروريات عشان يتلمو في سرير واحد في حلال الله وسنة رسولو المصطفى شنو ؟

حق الماذون .. إيجار بيت .. سرير ودولاب رف واحد .. توب ولبسة .. فتيل ريحة .. بوتوجاز .. تلاجة صغيرة .. ملايتين ومخدة .. وشاحن نوكيا ..
يكتبو الحاجات دي .. ويشوفو ح يلموها متين ..

وبعد داك أي شي بتاع مظاهر وشوفونا ..
يلحقوهو فتيل الجلسرين بتاع قبيل ..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
اعجبنـــــــــــــــــــي
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات مريخ السودان-سودان الصفوة :: الفئة الأولى :: منتدى المواضيع المميزة فى الفيسبوك-
انتقل الى: